Solomon ibn Gabirol

Dr Solomon ben Jehuda ibn Gabirol, churz Solomon (Salomo) ibn Gabirol oder Schlomo ibn Gevirol (uf d Wält choo 1021 oder 1022 z Málaga; gstorbe um 1057 z Valencia) isch e jüüdische Filosoof und Dichder im muslimische Spanie (al-Andalus) gsi. In dr latiinischsproochige christlige Gleertewält isch er under de latinisierte Nääme „Avicebron“ und „Avencebrol“ bekannt gsi; uf Arabisch het er Abū Ayyūb Sulaimān ibn Yaḥyā ibn Ǧebīrūl ghäisse.

Si hebräische Lyrik, wo zum e groosse Däil von ere pessimistische, wältflüchtige Stimmig brägt und in arabische Värsmaass verfasst isch, isch scho im Middelalter vo jüüdische Lääser seer gschetzt worde. Si het as mäisterhaft gulte und isch in d Gebätbüecher ufgnoo worde. Sini filosofische Leere hingege häi bi sine jüüdische Zitgenosse nume wenig und bi de Muslim überhaupt käi Achdig gfunde. D Resonanz uf sis filosofische Hauptwärk D Kwelle vom Lääbe, wo vo dr Middi vom 12. Joorhundert aa in ere latiinische Übersetzig vorglääge isch, isch in dr christlige Wält stark gsi. Dört het sis nöiplatonische Wältbild die nöiplatonischi Ströömig in dr Filosofii vo dr Scholastik gsterkt, bi aristotelisch orientierte Filosoofe isch si nöiplatonischi Anthropologii uf heftige Widerspruch gstoosse.